യുവതി ഭര്‍തൃവീട്ടില്‍ തീ കൊളുത്തി ആത്മഹത്യ ചെയ്ത സംഭവത്തില്‍ ഭര്‍ത്താവും ഭര്‍തൃ സഹോദരനും അറസ്റ്റില്‍.
1 min read
നിലമ്പൂര്‍: യുവതി ഭര്‍തൃവീട്ടില്‍ തീ കൊളുത്തി ആത്മഹത്യ ചെയ്ത സംഭവത്തില്‍ ഭര്‍ത്താവും ഭര്‍തൃ സഹോദരനും അറസ്റ്റില്‍.എടക്കര ഉണ്ണിചന്തം അരികുളങ്ങര അന്‍വര്‍ സാദിഖ് ( 39), സഹോദരന്‍ അബ്ദുല്‍ റസാഖ് (40) എന്നിവരെയാണ് നിലമ്പൂര്‍ ഡി വൈ എസ് പി സാജു.കെ.എബ്രഹാം അറസ്റ്റ് ചെയ്തത്.
സംഭവത്തില്‍ കൂടുതല്‍ അറസ്റ്റുണ്ടാകുമെന്ന് ഡി വൈ എസ് പി പറഞ്ഞു.
ഈ മാസം ഒന്നിനാണ് അന്‍വര്‍ സാദിഖിന്റെ ഭാര്യ സലീന (36) ഉണ്ണിചന്തത്തെ വീട്ടില്‍ തീ കൊളുത്തി ആത്മഹത്യ ചെയ്തത്. പുലര്‍ച്ചെ ആറ് മണിയോടെ വീടിന് സമീപത്തെ ഷെഡില്‍ തീ പൊള്ളലേറ്റ നിലയില്‍ കണ്ടെത്തിയ സലീനയെ നാട്ടുകാരും ബന്ധുക്കളും ഉടന്‍ ആശുപത്രിയില്‍ കൊണ്ടുപോയെങ്കിലും രക്ഷിക്കാനായില്ല. രാവിലെ പതിനൊന്നോടെ കോഴിക്കോട് മെഡിക്കല്‍ കോളേജ് ആശുപത്രിയില്‍ വെച്ചാണ് മരണപ്പെട്ടത്.
ആത്മഹത്യയെ തുടര്‍ന്ന് സലീനയുടെ വീട്ടുകാര്‍ ഭര്‍ത്താവിനെതിരെ അന്വേഷണം ആവശ്യപ്പെട്ടിരുന്നു. ഇതേ തുടര്‍ന്ന് പോലീസ് നടത്തിയ അന്വേഷണത്തിലാണ് ഭര്‍ത്താവും സഹോദരനും പിടിയിലായത്.ആത്മഹത്യാ പ്രേരണകുറ്റം, സ്ത്രീധന പീഡനം, ഗാര്‍ഹിക പീഡനം എന്നിവയാണ് പ്രതികള്‍ക്കെതിരെയുള്ള കേസുകള്‍. സലീനയുടെ ഭര്‍തൃ പിതാവ്, മാതാവ്, ഭര്‍തൃ സഹോദരന്റെ ഭാര്യ എന്നിവര്‍ക്കെതിരെയും പോലീസ് കേസെടുത്തിട്ടുണ്ട്. ഇവരെയും ഉടന്‍ അറസ്റ്റ് ചെയ്‌തേക്കും.
വിവാഹ സമയം 30 പവന്‍ സ്വര്‍ണം സലീനയുടെ വീട്ടുകാര്‍ നല്‍കിയിരുന്നു. എന്നാല്‍ സ്ത്രീധനത്തിന്റെ പേരില്‍ സലീനയെ ഭര്‍ത്താവും ഭര്‍തൃ വീട്ടുകാരും നിരന്തരം പീഡിപ്പിച്ചിരുന്നതായി പോലീസ് പറഞ്ഞു. നിലമ്പൂര്‍ ഫസ്റ്റ് ക്ലാസ് മജിസ്‌ട്രേറ്റ് കോടതിയില്‍ ഹാജരാക്കിയ പ്രതികളെ റിമാന്റ് ചെയ്തു.
എടക്കര സി ഐ മഞ്ജിത്ത് ലാല്‍, പ്രത്യേക അന്വേഷണ സംഘത്തിലെ എസ് ഐ എം.അസൈനാര്‍, പോലിസുകാരായ ടി.നിബിന്‍ദാസ് , കെ.ടി ആസഫലി, എ എസ് ഐ രതീഷ്,എസ് സി പി ഒ ശശി, സി പി ഒ മാരായ സലീന, ഫാസില്‍ കുരിക്കള്‍ എന്നിവരടങ്ങിയ സംഘമാണ് പ്രതികളെ അറസ്റ്റ് ചെയ്തത്.
ONE TV NEWS
